लॉकडाऊन स्टोरी - सावली !!

सकाळी नेहमी प्रमाणे आंघोळ झाल्यावर सुजाता पर्णवीला टॉवेल गुंडाळून बेडरूममध्ये तयार करण्यासाठी घेऊन गेली.सोबत नेहमी सारखी अखंड वटवट सुरू होतीच.तेच सुजाताला किचन मध्ये काम आठवलं म्हणून पर्णवी ला कपडे घालून घे मी आलेच अस सांगून निघून गेली.जरा वेळाने सुजाता परत आली तर पर्णवी माता व्यवस्थित आवरून तिच आपलं खेळणं सुरू झाल होत.

थोडं आवराआवर केल्यावर सुजाताच्या लक्षात आलं की पर्णवीचा टॉवेल कुठे सापडत नाही. म्हणून मग सुजाता ने विचारलं ...." पर्णवी....अग टॉवेल कुठे टाकला आहेस ? सापडत नाहीये?"

तर म्हणे...." अग आऊ ते बघ तिकडे झाडांवर टाकलाय..."

सुजाताला वाटलं की ...झाडांवर सुकण्यास टाकला आहे...म्हणून सुजाता म्हणाली..."पर्णवी ती काय कपडे वाळवण्याची जागा आहे का? अस नाही टाकायचं."

तर लगेच पलीकडून सणसणीत उत्तर आलं....."आऊ...मी काही तो वाळवण्यासाठी नाही टाकला आहे....अग बाहेर बघ किती ऊन आहे...त्या आपल्या झाडांना ऊन लागेल अन मग त्रास होईल ना म्हणून झाडांना सावलीसाठी तो टॉवेल टाकलाय...😇🤗"