आमच्या कडे प्रत्येक गोष्टीसाठी एक एकेचा टर्न ठरलेला असतो.अर्थात अंतिम निर्णय हा पर्णवीचाच असतो.जेवण,आंघोळ,ब्रश इ इ साठी तिचा मूड असेल त्याप्रमाणे मग कधी आजी,आजोबा,आत्तू असेल तर आत्तू ,सुजाता किंवा मग मी.कोणाचा टर्न ठरवून अस काही नाही.
बहुतांश वेळा शनिवार अन रविवार आंघोळीची जबाबदारी ही अस्मादिकांवर असते.आंघोळ कसली फक्त दंगा असतो..नक्की कोण कोणाला आंघोळ घालतय हे काही कळायला मार्ग नसतो...बाबू ..किती मळाला आहेस तू थांब घासू दे..तुझा साबण घे माझा नको वगैरे वगैरे डायलॉगबाजी असते. अन सर्वात महत्वाचं म्हणजे या निमित्ताने तिचं थोडं बौद्धिक पण घेता येत.मग चुकीच काय वागलं किंवा काही त्रास दिला असेल तर हे करायला नको हे पटवून देणं किंवा मग परत अस वागणार नाही हे प्रॉमिस करून घेणं म्हणजे एक दिव्य असतं.
दोन आठवड्यापूर्वी सुजाता ने मला सांगितलं होत की आजोबांना खाली फिरायला म्हणून चला अस बोलून खाली घेऊन जाते अन तिकडे त्यांच्याकडून कॅडबरी घेते.इतक्या वर प्रकरण थांबत नाही तर तिथेच संपवून वर आजोबांना दम द्यायचा आऊ ला अन बाबाला सांगू नका.[आम्ही दोघे अगदी लिमिटेड अन केव्हा तरी कॅडबरी देतो म्हणून ही आयडिया ]
असच मग शनिवारी आंघोळ करताना पर्णवी ला समजावून सांगू या असा विचार केला होता त्याप्रमाणे दोन आठवड्यापूर्वी आंघोळ करतानाच हे बौद्धिक 😂
त्यादिवशी हिला कस समजावं या विचारातच आमची मस्ती सुरू झाली.मग अचानक लक्षात आलं शाम्पू करताना हिला सांगावं चांगले छान केस हवे असतील तर रोज रोज कॅडबरी खाऊ नकोस.
मी: बच्चा...किती रे केस गंदू झालेत तुझे...हे बघ
पर्णवी: अरे बबुडी...ते बालभवन ला आम्ही खेळतो ना त्यामुळे खराब झालेत [ बाबाची या गुगली वर विकेट गेलेली असते ]
मी: पिल्या....हे बघ तुझे केस गळायला पण लागलेत ...सर्व केस जातील बर का.
मी पुढे काही बोलणार त्याआधीच पुढचा षटकार तयार असतो
पर्णवी: हे तुमच्या दोघांमुळेच झालंय
मी: काय झालंय?
पर्णवी: आऊ अन तू...तुमच्यामुळेच माझे केस गळायला लागलेत [खरा शब्द गळवायला असा होता 😂😂]
मी : अग...पण आम्ही काय केलंय?
पर्णवी : तुम्ही दोघांनी वैताग दिलाय मला अन त्यामुळे केस गळाले [अन हे पूर्ण expression सह असतं]
मी: [शक्य तितकं हसू दाबून] वैताग म्हणजे नक्की काय ग?
पर्णवी: वैताग म्हणजे तो असतो रे... [थोडा जरा विचार केल्या सारख] मी सारं तुमचं ऐकत पण तुम्ही माझं काहीच ऐकत नाही.सगळं मलाच ऐकायला लागतं.माझं कोणीच काही ऐकत नाही
आता बाबाचा एवढा मोठा बौद्धिक झाल्यावर बाबा काय बोलणार??? जास्त काही न बोलता परत गुपचूप नेहमी प्रमाणे मस्ती सुरू झालेली असते.
