शिवराय शक्तीदाता😊

महाराजांच्या गोष्टी, महाराजांचे नुकतेच आलेले जवळपास सगळेच चित्रपट पाहिल्या मुळे खूप दिवसांपासून पर्णवी ला शिवनेरी वर घेऊन जायचं बकेट लिस्ट मध्ये होत पण त्याचा काही योग काही जुळून यरत नव्हता .पण अखेरीस यावेळी दिवाळीच्या सुट्टी मध्ये पर्णवी गावी गेली तेव्हा सुजाता सोबत शिवनेरी ला जाण्याचा योग आला.

शिवनेरी वर महाराजांचं जन्मस्थळ पाहून तर पर्णवी खूप खुश झाली होती लगेच तिथूनच मला व्हिडिओ कॉल आला अन लगेच रिपोर्टिंग सुरू 🤣🤣🤣🤣

महाराजांचे जन्मस्थान, त्यांचा पाळणा अन महाराज लहानपणी इथे खेळले असणार यानेच ती एकदम भारावून गेली होती.अन त्यातच तिने अस काही अनपेक्षित काम केलं की मला ऐकल्यावर एकदम धक्काच बसला. 

तिने महाराजांच्या जन्मस्थळा जवळील माती घेतली अन रुमालात बांधून ठेवली.अन पुण्यात येईपर्यंत अगदी व्यवस्थित सांभाळून ठेवली.इकडे सुट्टी वरून परत आली तेव्हा ती माती सर्वात आधी देवघरात एका भांड्यात अगदी व्यवस्थित ठेवली आहे अन सोबतच आजोबांना एक बौद्धिक पण देऊन झालं.😆😆

आता रोज सकाळी आंघोळ वगैरे झाली की सर्वात आधी पूजा होते ती या मातीची.मागच्या आठवड्यात मला बरं वाटत नव्हतं तर माती समोर जी उदबत्ती लावली त्याचा अंगारा घेऊन माझ्या डोक्याला लावला अन म्हणे..."बाबा...आता बघ तुला लगेच आराम वाटेल..." 😀

मी इतक्या वेळा शिवनेरी वर गेलो, राजगड, रायगड वर नियमितपणे जाऊन आलोय तिथे नतमस्तक झालो पण माती घेऊन यावं हे काही कधी सुचलं नाही 😃