कोल्ड कॉफी 😃

विकांताला मला सकाळीच कामासाठी बाहेर जायचं होतं म्हणून मी माझं पटकन आवरून तयार होतो.निघणार तोच पिल्लू बागडत आलं अन अगदी केविलवाणा भाव घेऊन म्हणे..

"बाबा...तू बाहेर जातो आहेस काय..."

म्हणलं ..."हो पिलू...मला थोड्या वेळाच काम आहे एक दोन तासात येईल लगेच..."

माझं बोलणं पूर्ण होण्या आधीच लगेच समोरून प्रत्युत्तर आलं..."थोडंच काम आहे तर मी पण येऊ का...चालेल ना..."

नाही म्हणायचा काही प्रश्नच नव्हता किंवा तो पर्याय च नव्हता...मी काही बोलण्याआधी स्वारी अगदी शून्य मिनिटात तयार पण झाली. बाबा ला ब्लॅकमेल करून कस गंडवायच हे अगदी परफेक्ट जमायला लागलं आहे 😂😅

आम्ही नाश्ता न करताच निघालो होतो त्यामुळे सोसायटी मधून जस बाहेर पडलो तेच मी आपलं सहज विचारलं ..."पर्नू...तुला भूक लागली आहे का? नाश्ता करायचं का ?"

तर म्हणे..."बाबा...म्हणजे अस काही नाही...पण तू म्हणत असशील तर करू या नाश्ता...."म्हणजेच याचा अर्थ असा की बाबा नाश्ता करायचा आहे 😂😅

नाश्ता करायचा म्हणून मग आम्ही डोसा खायला रेस्टॉरंट मध्ये गेलो.ऑर्डर दिली अन मग आमच्या दोघांच्या गप्पा टप्पा सुरू झाल्या मग हॉटेलमध्ये हेच का मग तस का नाही असं काहीसं सुरू होतं. मी आपलं शक्य तितके उत्तर देत होतो.तेच आम्ही बसलो तिथेच समोरील बाजूला फिल्टर कॉफी बनवत होते ते पाहून पर्णवी म्हणे..."बाबा,कोल्ड कॉफी कशी बनवतात...गोड असते का...बर्फ असतो का...खूपच थंड  असते का..." अशा एका मागून एक बाऊन्सर आले...मी सगळी उत्तर देत गेलो अन मग शेवटी गुगली पडली....

"बाबी....ऐक ना...आपण आज कोल्ड कॉफी पिऊ या का रे...मी कधीच पिली नाहीये...आदु, रितिका,निहू यांनी सर्वांनी पिली आहे..."

मी शक्य तितका निर्विकार भाव ठेवत फक्त ..."हम्म" केलं यावर मग प्रत्युत्तर आलं..

"तू अन आई म्हणाला आहात की मी  11 years ची झाल्यावर मला कॉफी देणार ..."

"पण मला माहित आहे की मी 11 years ची झाली की तुम्ही म्हणणार 15 years ची झाली की देऊ...अन अस करत करत मी म्हातारी होईल....अन म्हातारी झाल्यावर पण  तुम्ही म्हणाल...पर्नू...अजून थोडी म्हातारी होऊ दे मग तुला कोल्ड कॉफी देतो...अरे अस कुठे कधी असत का" 😂😂😂😂

अन यानंतर मात्र मला काही सिरीयस राहता आलं नाही आणि सोबत डोसा पण आला...त्यामुळे जास्त काही न बोलता आज आपण पिऊ या अस म्हणत खाण्याचं काम सुरू झालं.😃

Read More

खायची गोष्ट आहे का...😉

संध्याकाळी मी कामानिमित्त बाहेर गेलो होतो तेव्हा ट्रॅफिक मध्ये अडकून राहिलो त्यामुळे यायला उशीर झाला होता.रात्रीच्या जेवणात थालीपीठ चा बेत होता.थालीपीठ अन शेजवान चटणी हा पर्णवी चा एकदम आवडता प्रकार आहे.नेमकं शेजवान चटणी संपलेली मला यायला उशीर मग आता दुकानात कोण जाणार यावरून माय लेकी मध्ये झालेली फटकेबाजी खालील प्रमाणे....

पर्णवी- आई, मी जाते ना एकटी दुकानात अन घेऊन येते चटणी.

सुजाता- पिलू....तू लहान आहेस अजून अन आता अंधार पण पडला आहे...मी बाबा ला सांगते तो घेऊन येईल

पर्णवी-  आई...तुला ना मला लहान च ठेवायचं आहे...मी 11 years ची झाली किंवा 13 years ची झाली तरी तू असंच म्हणणार आहेस

सुजाता : अग पण रात्री गाड्या वेगात असतात...तुला अंधारात लक्षात नाही येणार.

पर्णवी - आई तुला माहीत आहे का टीचर ने आम्हाला स्कुल मध्ये रस्ता कसा क्रॉस करायचा हे शिकवलं आहे.अन शाळेत काय असंच उगाचंच शिकवतात का? अन मी 4 years ची होती तेव्हा गेली होती की नाही एकटी?

सुजाता - हो...तू गेली होतीस पण तेव्हा बाबा गुपचूप तुझ्या पाठीमागे आला होता.

पर्णवी - आई, तू फक्त 10 रुपयाचं coin नेऊ की नोट नेऊ एवढंच सांग...मी काही आता लहान नाही... मी एकटी जाऊन घेऊन येऊ शकते

सुजाता - नाय रे पिल्लू....अजून तू लहान च आहेस त्यामुळे अंधारात एकटी नको जाऊ बरं

पर्णवी- आई ....आता मी 7 years ची झाली आहे ...अन 7 years म्हणजे काही लहान नाहीये....मी मोठी च झाली आहे....7 years च होणं म्हणजे काही खायची गोष्ट नाही...समजलं ना 😂😂🤣🤣🤣

अखेरीस मोठ्ठं झालेल्या माणसाने फोन करून बाबा लाच चटणी आणायला लावली 😁😃

Read More

आता काय...😃

वेळ : रात्री 11.30 ची

स्थळ : बेडरूम

पात्र : आई , बाबा अन पर्णवी

दुपारी मस्त पैकी झोप झाल्यामुळे रात्री 11 नंतर मग पर्णवी च्या  दिवसाची सुरुवात झाली होती.माझं ऑफीसच काम पण जवळपास संपत आलं होत त्यामुळे माझी आपली आवराआवर चालली होती. अन सोबतीला पर्णवी चा दंगा सुरू होता.मी माझं आपलं आवरत होतो पण नियमानुसार बेड च्या एकूण एक कोपऱ्यात पर्णवी ची खेळणी, वह्या ,पुस्तके असा मजबूत पसारा पडला होता.शाळेची बॅग सुद्धा सुजाताला भरायला लावून पर्णवी माता मस्तपैकी चिल करत होत्या.असा एकंदरीत माहोल होता.

पण इतका पसारा बघून मग मात्र सुजाता ने जरासा सौम्य असा रुद्रावतार घेतला अन पर्णवी ला जरासं ओरडली.अन त्यानंतर जरा व्यवस्थित ठेवण्या वरून थोडं फार सुनावलं तर यावर आलेली प्रतिक्रिया :

पर्णवी : आई, तुला पण आत्ताच बोलायचं होत का?

सुजाता: अग पण काय झालं

पर्णवी : तू आता झोपताना पसाऱ्यावरून का बोलली,आता हे सगळं माझ्या डोक्यात राहणार अन मी विचार करत झोपणार नाही ते सुद्धा सकाळी 6 पर्यंत...

मी: म्हणजे आता मला पण पर्णवी सोबत जागायला लागणार तर...

सुजाता: हो काय....बर ठीक आहे मग आता तुम्ही दोघे जागणार आहातच तर तेवढा संस्कृत चा अभ्यास तेवढा पूर्ण करून घ्या 😂🤣

अभ्यासाचं नाव येताच एकदम वातावरणात बदल अन म्हणे...

"काही नको ...ऑलरेडी एक डोक्यात आहे तर आता अजून एक डोक्यावर देऊ नकोस...जाऊ दे मी झोपतेच आता..."

हे असं इतकं आता नौटंकी सुरू असत...😂😂😂🤣🤣🤣

Read More

बोबड बोल 😀

पर्णवी खूप जास्त बोबड काही बोलली नाही पण काही शब्दांचे उच्चार मात्र किंवा त्यांना वेगळं काही तर आपलं स्वतःच लॉजिक लावत काही तरी वेगळाच उच्चार करायचा.अशेच काही बोबडे बोल 😃

प्रसंग 1:

पर्णवी चल बर पटकन 1 ते 100 मराठी मधून म्हण बर.1ते 80 पर्यंत गाडी एकदम सुसाट सगळे उच्चार अन क्रम एकदम व्यवस्थित आता सुरूवात झाली..

एक्केऐंशी

ब्याऐंशी

.

.

.

.

सत्याऐंशी

अठ्ठ्याऐंशी

यानंतर मात्र गाडी अडकली. 88 नंतर काय हे काही आठवेना...अखेरीस मग चला माघार कशी घेणार म्हणून मग म्हणे..

नव्व्याऐंशी

अशा प्रकारे एकोंनव्वद ला आम्ही समानार्थी शब्द शोधला आहे 😂😂😂

प्रसंग 2:

पर्णवी अन सुजाता यांच शाळेचं काही तरी activity की काय सुरू होत तेव्हा पंचिंग मशीन हवं होतं. तर पर्णवी म्हणे अरे मला ते चिंगपिंग मशीन द्या रे.😂🤣🤣

प्रसंग 3:

पर्णवीच्या परीक्षा सुरू झाल्या होत्या तेव्हाची ही गोष्ट आहे.मी, पर्णवी अन भाचा अद्वय अस आम्हा तिघांची मस्ती सुरू होती. जरा वेळ मस्ती करून मग मी त्यांना म्हणालो चला आता बस झालं...मस्ती खूप झाली आता पटकन आपआपला अभ्यास संपवून घ्या बर.

यावर पर्णवी म्हणे..."बाबा...उद्या तर माझी ओलर आहे...अन माझा तर ओलरचा सगळा अभ्यास झालाय..."

ते ओलर म्हणजे ओरल बर...🤣🤣😂🤣

प्रसंग 4:

TV वरील जाहिरात हा पर्णवी चा अत्यंत आवडता प्रकार आहे.बऱ्याच जाहिरात किंवा त्यांच्या जिंगल्स तिला पाठ पण आहे.जाहीरात मध्ये एखादा शब्द न समजणारा असला की मग तिथे एकतर काही तरी ल ल ला किंवा मग तिच्या समजुतीने हवा तो शब्द टाकणार.पितांबरी ची गूळ पावडर ची जी जाहिरात आहे ती एक सर्वात जास्त आवडीची.त्यात एक ओळ अशी आहे वेळ आली पश्चात्तापाची....तर पश्चात्ताप काही बोलता येत नव्हता त्याऐवजी आमचा शब्द होता पक्षाताप..... वेळ आली पक्षातापाची 😂😂

असेच अजून काही शब्द...

हॉस्पिटल - हॉस्टीपल

रिक्षा - रिशका

लॅपटॉप - लॅटपॉट

इंजेक्शन - इंजेक्षण

आईस्क्रीम - आईशिम

Read More

स्वामी आजोबा !!

पर्णवीला अजाणतेपणा पासून स्वामींचे आकर्षण आहे.लहानपणी झोपताना स्वामींचा जप असो किंवा तारकमंत्र लावला की अगदी तल्लीन होऊन ऐकायची. मग जसजशी मोठी होत गेली तशी स्वामी आजोबा तिचे फ्रेंड झाले.त्यांच्या सोबत गप्पा मारते ,आमचं काही चुकलं की स्वामींना तक्रार करते.तिच्या कडून चुकीचे वागलं गेलं किंवा बोललं गेलं की लगेच स्वामींच्या समोर जाऊन चूक कबूल करते.

स्वामींची मालिका सुरू झाल्यापासून तर मग खूप सारे प्रश्न पडतात,काही प्रश्न तर असे असतात की त्याची उत्तर आम्हाला माहीत नसतात मग अशा वेळी आमचे गुरुमाऊली अन तिचे विजय काका म्हणजे हक्काचं माणूस,त्यांना फोन करून प्रश्न विचारायचं. 

सातारा जवळ बोरणे ला आमचा स्वामींचा मठ आहे.शक्य होईल तेव्हा आम्ही तिथे मठात सेवेसाठी किंवा पायी अक्कलकोट वारीला जात असतो.एकदा तर जाताना संपूर्ण प्रवासात स्वामींच्या मालिकेचं गाणं आमच्या कडून म्हणून घेतलं होतं..त्यात पण स्वामी आजोबांचं गाणं आहे नीट म्हणायच,थोडा उच्चार चुकला तरी परत म्हणायला लावलं 🤣😂

तर एकंदरीत अस हे सारं स्वामी प्रेम आहे.काल सुजाता अन ती अशा दोघींच्या गप्पा सुरु होत्या तर अचानक म्हणे..

"आई ,तुला सांगू का आपण कोणीच स्वामींना "स्वामी" किंवा "श्री स्वामी समर्थ " अस काही म्हणायला नको..."

"हो का....का ग...अस का बरं...."

"अग आई...ते आपल्या सर्वांपेक्षा किती मोठे आहेत...अन आपण किती लहान आहोत..."

"अस होय...."

"त्यांचे  गुरू च त्यांना फक्त स्वामी म्हणणार कारण ते त्यांच्या पेक्षा मोठे असणार ना..."

"बर मग आपण काय म्हणायचं ?"

"आपण ना  स्वामी आजोबा असंच म्हणायचं...."🥰

Read More

आज्जी....

 आजी अन आजोबा यांच्यावर बारीक लक्ष ठेवण्याची जबाबदारी ही  पर्णवी वर  दिली आहे . लक्ष म्हणजे काय दिवसभरात आराम केला किंवा नाही  की फक्त काम करत राहिलेत , वेळेवर जेवण अन औषध घेतलं का  अन इतर बाकी काय उद्योग केले का हे सार काही पर्णवी च काम आहे. अन मग संध्याकाळी ऑफिसवरून आलो  की मग दिवसभराचा सगळा डिटेल रिपोर्ट मग मला दिला जातो. 

आजोबांच्या बाबतीत जास्त काही तक्रार नसते त्यांचं सार काही वेळेवर अन तब्येतीला जपून असतं याउलट आजीची मात्र मोठी तक्रार असते. बाबी, आजी आज झोपली नाही , मास्क न लावताच खाली जाणार होती, हात धुवायला विसरली, औषध पण नाही घेतलं वगैरे वगैरे.... अन तुला माहीत आहे का ती माझं ऐकतच नाही आता तूच काही तरी कर बरं . 

मग मीच पर्णवी ला विचारतो , चिकू मला तर काही सुचत नाही तूच काही तरी आयडिया सांग बरं .... असं म्हणाल की मग अशा काही एकाहून एक भन्नाट आयडिया डोक्यातून येतात  की बस्स.... जस की .. 

- बाबी आपण किचन ला ग्रील बसवू अन लॉक लावू या का?

- बाबी आपण  असा अलार्म लावू या का रे  की आजी आली की मग तो वाजायला हवा 

- बाबी, नाही तर असं करू आपण आजी ला किनई छुम छुम वालं  पैंजण आणू या का? म्हणजे मग काय होईल आजी कुठेही जाणार असेल  की  त्याचा आवाज झाला  की लगेच आपल्याला समजेल  

असं बरच काही काही चालू असत... असो तर असं एकंदरीत आजी अन नात प्रकरण आहे . दोनेक आठवड्यापूर्वी मी अन चिकू गप्पा मारत बसलो होतो. अन नेहमी प्रमाणे गाडी आजीवर येऊन थांबली. मग पुन्हा एकदा आजीने आराम करायला हवा यासाठी काय करावं बरं .... ती सारखं काही ना काही काम करत राहते  मग आपण काय बरं करू शकतो... आता विषय आपला नेहमीचाच होता म्हणालं आता जरा चिकूची फिरकी घेऊ या बरं . 

म्हणून तिला म्हणाल ..." चिकू.... आता मला काही सांगू नको बघ ...मी थकलो आहे ... आजी साठी माझ्याकडे तरी काही उपयोग नाही आता तुलाच काही तरी करावं लागणार माझं तर डोकं बंद झालं आहे..."

असं म्हणाल्यावर लगेच एकदम गंभीर चेहरा करून म्हणे ..... " बाबी ... तूझ्या सारखंच माझं पण झालं आहे माझ्याकडे पण काही उपाय नाही रे... "

"अन तुला सांगू का .... ही आजी म्हणजे ना ..."खालून पापड अन वरतून काठी असा प्रकार आहे बघ ...."".. 😅😅

हे ऐकल्या बरोबर मी अशक्य हसलोय. आता हे कुठे ऐकलं अन कुठून आल हे देवाक ठाऊक. सहा वर्षांचा असताना आम्हाला  शेंबूड पुसता येत नव्हता अन आता हे बघा किती मोठ्या मोठ्या गप्पा 😂😂

Read More

डॉक्टर!!

पर्णवी ची डेंटिस्ट ची अपॉइंटमेंट होती म्हणून आम्ही निघालो होतो.डेंटिस्ट अन तिचे आयुर्वेदिक डॉक्टर एकाच ठिकाणी आहेत.अन आयुर्वेदिक डॉक्टरांसोबत तिचं मोठं असं गप्पाष्टक असतं. मागील वेळी गेलो होतो तेव्हा पर्णवी एकटीच होती यावेळी मात्र अद्वय पण सोबत होता.तस अद्वय पेक्षा पर्णवी फक्त सहा महिन्यांनीच मोठी आहे पण संधी मिळताच ताईगिरीची एक पण संधी सोडत नाही.

यावेळी पण असंच झालं.मागील वेळेस पर्णवी एकदा जाउन आली होती मात्र अद्वय पहिल्यांदाच डेंटिस्ट कडे चालला होता त्यामुळे डॉक्टर कशा आहेत, त्या काय काय बोलल्या,तिथं जाऊन काय बोलायचं ,काय करायचं काय नाही करायचं या सूचनांची अगदी जंत्रीच होती.

हे चालू होतं तेच अचानक पर्णवी म्हणे...

"हे बघ आदू... आता तुला जरा महत्त्वाचे सांगते आहे...नीट ऐकून घे..."

"आपण दवाखान्यात गेलो की बाहेर बसावं लागेल अन मग काही वेळाने डॉक्टर काका मलाच बोलावतील..... त्यांना माझ्या सोबत बोलायचं असतं.... अन तेव्हा फक्त माझ्याशीच बोलतील....अन आमचं बोलणं सुरू असताना मध्येच येऊ नकोस अन आलास तर बोलू पण नको..."

"काय समजलं ना....लक्षात राहील ना...."

"डॉक्टर काकांना महत्त्वाचे बोलायचं असतं...त्यामुळे आम्हाला डिस्टर्ब करायचं नाही.... आमचं बोलणं झालं की मग तू बोल..."

😂😂😂🤣🤣😂🤣🤣🤣

Read More