घराचा असा एकही कोपरा नाही की जिथे पर्णवी मातेने आपल्या अस्तित्वाची खूण सोडली नाही.पर्णवी शाळेत जाते तेव्हा त्या वेळात घर मोकळा श्वास घेत. अन त्या वेळात घर अगदी गरीब होऊन जातं.सार काही जागेवर,कुठेही काहीच अस्ताव्यस्त नाही.यादरम्यान घराला जी काही गरिबी येते ती पर्णवी च आगमन होताच चुटकीसरशी गायब होते अन घर गर्भश्रीमंत होतं. हॉल,किचन ,बेडरूम, गॅलरी ,ड्रेसिंग टेबल ,सोफा इ इ ठिकाणी लाथ मारेल तिथे पाणी काढेल या धर्तीवर हात घालेल तिथे पर्णवी ची वस्तू सापडेल अशी परिस्थिती असते.
अन यानंतर मग खरी गंमत असते.कारण पसारा आवरायचा कोणी हा फार मोठा मुद्दा असतो.अन मग अशा वेळी बाबा वरील प्रेम उफाळून येतं. मग एक ना अनेक क्लुप्त्या सुरू होतात... एकदम लाडात यायचं....बाबा तू किती चांगला आहेस...तू बेस्ट आहेस... आज मी खूप थकले आहे... मग आपण समजून घ्यायचे वधस्तंभावर जायची ही तयारी आहे.शास्त्रा प्रमाणे पसारा आवरणे प्रकारात बाबा चाच नेहमी बळी असतो कारण आई कडे शष्प काही होणार नाही हे एकदम ठावूक असतं. कारण आई लेकीच्या एक पाऊल पुढे आहे त्यामुळे तिकडे डाळ काही शिजत नाही.
असंच काहीसं आता शुक्रवारी झालं. बेडरूममध्ये पर्णवी ने फुलऑन राडा करून ठेवला होता.जेवणं झाली अन त्यानंतर जोश मध्ये मस्ती सुरू होती.सगळ्यांना त्रास देण्याचं काम सुरू होतं तितक्यात सुजाता ने किचन मधूनच ऑर्डर सोडली इतकाच जोश आहे तर पटकन पसारा आवरून घे म्हणजे मग पटकन झोपता येईल. या एका वाक्यासरशी सगळा माहोल च बदलून गेला.मी संधी साधून हॉल मध्येच आडवा होऊन गेलो.कारण पसारा गळ्यात पडणार हे लक्षात आलं होत.सुजाता च्या आदेश येताच नेहमी प्रमाणे पर्णवी ने लगेच माझ्याकडे बघत मी करू शकतो की नाही याचा अंदाज घेतला.जस लक्षात आलं की आज बाबा कडे आपलं काही होणार नाही. तस लगेच पुन्हा किचनमध्ये सुजाता कडे जात म्हणे,
"आई...एक सांग रोज पसारा आपण दोघीचं आवरत असतो की नाही?"
"हो...."
"बाबा ने कधीतरी पसारा आवरला आहे का...रोज
आपल्यालाच पसारा आवरायला लागतो..."
"बरं मग..."असा भाव ठेवत सुजाता ने फक्त पर्णवी कडे बघितलं.
"मग आता मला एक सांग...रोज आपणच आवरतो मग किमान weekend ला तरी बाबा ने आवरायला हवंय की नाही..सांग बरं..."
सुजाता गडबडीत होती त्यामुळे काही करा पण पसारा आवरा बाकी मला काही माहीत नाही... असंच होतं...आई चा एकंदरीत नूर बघून पुन्हा रोख बाबा वर आला. अन बाहेर येऊन लगेच आदेश सुटला...
"बाबा हे बघ...रोज मी अन आई पसारा आवरत असतो त्यामुळे नियमानुसार weekend ला तुलाच पसारा आवरावा लागणार आहे..."🤣🤣🤣🤣
मग यानंतर बाबा गप गुमान पसारा आवरायला निघाला🙈😂
